Von Walter Osterkorn

„Kaunst ma du sechzg Sekundn borgn?“
„Woarum brauchst du sechzg Sekundn vo mia?“
„Woarum brauch i sechzg Sekundn vo dia. I mach bei ana Faschingsveraunstoiddung mid. Da spü i in an Programm, bei dem de Zeit genau eindeut is. I muass sechzg Minutn ausfülln und da fäht ma grad amoi oa Minutn. Des san sechzg Sekundn, wiaßt woaßt, und um de dat i dih bittn.“
„Was fian Noarrn spüstn leicht dort?“
„I spü goa koan Noarrn, i spü an Kasperl, aba ned den min Krokodü. So an Kasperl haums nuh nia gsehgn, wia i da oana bin.“
„Des deng i ma. I kenn ah koan Kasperl, der sih vo wem aundan a Zeit ausborgt. Des muass scho a gaunz a bsundara sei. Oiso ehrlich gsagt, waunsd des nuh ändern kaunst, spü liawa an Noarrn, der passad in den Foi bessa. A Kasperl, der sih a Zeit ausborgt, bei dems ned amoi a Krokodü gibt, des is koa normaler Kasperl, des is a Noarr. Drum was besser, du spüst a so an Noarrn, wei ehrlich gsagt, sunst machst dih wirklih zu an Kasperl.“
„Bei dera Veraunstoiddung bin i ja da Kasperl, des hab i da grad gsagt. Woarum soid i mih da zu an Noarrn macha. De Rolln liegt ma ned, da bracht i nia in Lebm a gaunze Stund zaum. Da miassad i dih bestimmt um vü mehr Zeit bittn. Oiso sei so liab, hüf ma mid de boa Sekundn aus. Du brauchst ma nua in Petzi macha. Wirst doh wohl sechzg Sekundn zaumbringa, des kaun doh ned so schwa sei. Was machast denn du, waunsd fast a Stund in Kasperl spün miassast?“
„Du redst vo oana Stund. Waun i ma dih so auschau, bist da Kasperl in Person. Des Gwaund kaunsd du nimma ablegn, des is fia dih zuagschneidert. In dera Rolln kummt ah kao Noarr mehr mid, da machad a sih säwa zu an Kasperl. So an Noarrn muasst erst amoi findn, der sih säm zu an Kasperl macht. Mia gehts ned um de sechzg Sekundn, mia gehts um des Narrische, des du  vo mia verlaungst. Waun i a Rolln spü, daun leb i mih da eini und i mecht ned da Petzi sei, der bei so an narrischn Kasperl midspün soid. Vo mia aus kaunsd de sechzg Sekundn haum, aba i sitz in dera Zeit bei de Zuschauer.“