Von Elisabeth Holl

Ih woar amoi im Kranknhaus wegn Untersuchungen und hätt eigentlih scho hoamgeh derfm. Aber aun dem Tag woar grad Liachtmessn und ih hab gwißt, dass dort a recht schene Feier is. Daweil ih mit mein Maunn da drüber gredt hab, is hinter uns ah oidds Muattal daherkema. „Mei“, hats gsagt, „ih mecht so gern ö d´ Liachtmessfeier geh´, aber alloa trau ih mar net drüber“.

Sie hat mih angschaut voill Vatraun, a stumme Bitt´ ö dö Augn. Da hab ih gar net anders kinna als ihr sagn, dass ih´s mitnimm. Mei Maunn hat ah net aunders kinna ois sagn: „Bleib hoit nuh da und nimm dih aun um sie“. Und a so is´s ah gschehgn.

Dö Krankenschwester hats zsammgricht und in Sessl einibett´. A so hab ih´s dann mitgnumma zur Liachtmessfeier in da Hauskapelln. Ganz vorn hab ih´s hinstelln derfm und ih hab mih danebm in a Bank einigsitzt. ´s Muattal is dagsessn mit gfoite Händd und ihre Augn ham gleicht vor lauter Freid. Mir is´s viakema wia waunns in Himmö einischauat. Wiar ih´s a so gsehgn hab, is mar ganz woarm wordn ums Herz. Ih hab so richtig gspiart, wia schen dös is, wann ma an Menschn glücklih macht, und wanns nur mit a kloan Gfälligkeit is.

Kaufm kann ma so ah Freid net, sie kimmt vo einwendig aussa und gheart zo dö kloan Wunder in Lebm.