Von Wilhelm Fischer

Mia hobm ba ins in Ort an Judovarein. Den leidd a ochzgjahriga Maunn, da Bauer Adi, a Träga van zehntn Dan, a Unikum, woahrhofti. Ollö meine Kinda hobm ba eahm glernt: Judo, Jiu-Jitsu und Sölbstvateidigung.
I woass neamma, wias dazua kemma sand. I moa, i da Voiksschui hot eahna wer launge Zähnd gmocht, dass ban Bauer Adi a so a Gaudi is.
Du, der hot neamd gfiarcht.
Do hobm si an etla Leit beklogt, dass i da Traunleitn vo Sandla afghoitn woardn sand. Dö hättn gsogt, sie lossatns netta weida geh, waunns an Zehner aussaruckatn.
Do is da Adi hi und hots a so schnö ban Krawattl pockt, dass mitn schau net zaumm kemma sand. Schwupsdi sands scho dogsessn af eahnan Hintan. Vo do aun woara Ruah.
Ba da Hoitstö vo dö Autobuss am Moarktplotz sitznd oiweul dö Schüla und a ödare Teenager af da Loah und dö Fiass stöllns dabei af dö Sitz vo dö Bänk, dö dort stehngand, dass si dö Leit ausrostn kinnand, waunns woartn miassn.
Geht dar Adi vurbei mitn Regnschirm inter dar Iaxn. Sogt a za dö Teenager:
„Sitzts ös dahoam aa aso umadum, dass dö dreckign Schuach af dö Möwöln affö stödds?“
Sogt a so a Biarschal potzig:
„Wos wüst, Oida?“
Der hot dös letzte Woart nu goar net ausgredt ghot, do hot dar Adi scho midn Regnschirm ba sein Haxn eighagöt und hotn owaghoit va da Loahn.
Hiatzt steigt eahm an aundara va dö Bazi zuawö und sogt:
„Du Opa, passt da wos net?“
Owa dös „passt da wos net?“ hot ma fost neamma gheart, weuln da Adi scho in Schwitzkostn ghot hot.
Soichane Husarnsticköln hot a no vü voibrocht, da Judo Bauer, und dö  Schandarm nennand eahm deswegn in „Hüfssheriff“.
Sei Motto hoasst: „Waunn si oana wiar a Depp benimmt, muass mar eahm zoagn, wia s richti is, und dös geht netta, waunn s d eahm iwa bist. Dabei is Gschwindichkeit und Iwaroschung oiss.“
Und daunn hoda ma sein Trick zoagt:
Blitzoarti springtar af sei vis a vis zu, staumpft mit dö Fiass in Bodn eini, dass  krocht, reisst d Händ af d Hech, wia waunna in aundan daschlogn mechat und stesst an Schroa aus, dass eahms Bluat gfriart. Dabei schauda eahm mit an messaschoarfn Blick i d Augn.
„I tua neamd weh“, sogta „owa sie wissens eh a so aa glei, dassa si vazupfn soin.“
Dös woar dö Vorgschicht, s Eigentliche kimmt hiatzt.

I hob i da Schui a Klass ghobt, dö woar a so zwida, dass i ma öfta denkt hob: „Oisaunt kunnt i eich d Guargl umdrahn, ös Ruabmzuzla!“ Hümmövoda, vazeih mas, owa do kaunnst da goar net hölfn, dö Gedangan kemman gaunz vo sölwa.
Aun dem nämlichn Tog is dazua grod aa nu vor meina Stund a Schuioarweit gwen. I hob mi bemiaht, hob mei gaunze Pädagogik strapaziert und oiss, wos i no gwisst ho va da Psychologie, va da Didaktik und va da Katechetik. Oiss woar fia d Kotz. Sie hobm koa Ruah net gebm.
I hos aungsäuslt ois wia da Friahlingswind, hob eahna ins Gwissn gredt und gsogt:
„Schauts, seids do net a so!“
I hob eahna droht:
„Lost amoi her! I bi a nettar a Mensch mit begrenzte Nervn und waunn i mei Fossung valier, garantier i eich fia nix, weul i bin a Choleriker.“
Daweul i eahna dö Staundpaukn hoit, mocht oana hintn akkrat seine Faxn und füht si recht stoark, weul seine Kaumarodn za dö Spampanadln fest glocht hobm. Do hob i ma denkt:
„Hiatzt bist as, Wülhölm, dö hobm di af da Schaufö.“
Owa do foit ma da Bauer Adi ei.
„Kemmans aussa!“ sog i za dem Kaschpal. Der moant, er kaunn seine Dodlarein heraussn weida mochn und voar da Klass a Theata spün.
Wiara oan Schriedd vor meina steht, spring i blitzoarti af eahm zua, staumpf mit dö Fiass in Bodn eini, dass krocht, reiss d Händ af d Hech, wia waunn i eahm daschlogn  mechat und stess an Schroa aus, dass eahms Bluat gfriart. Dabei schau i eahm mit an messaschoarfn Blick in d Augn.
Do is eahms Hearn und Sehgn vagaunga, und fost hättsn afn Ollawertestn higsitzt.
D Foarb is eahm oglaffn und ma hots eahm augsehgn, dass a si fiarcht. In da Klass woars mucksmäuserl stüll und dö Blick vo dö Schüla hobm gflackat wia Irrliachter.
„Setzns eahna nieda!“ sog i za dem Dadodaddn und za da Klass:
„Und dassi jo koana mehr riahrt!“
Va do aun howi mei Ruah ghot. I ho natierli nia gsogt, dassi aussa den Trick van Bauer Adi va Jiu-Jitsu und va Sölbstvateidigung nix vasteh, und so sands ma nia drafkemma, dassi s netta blufft ho.