lenxdd is da schnee zruna und draussn iss schee woam und da dog woxdd schou wieda da suniwenddn endgegn. gesddan is mei hoizbaua do gwen und hod ma a fua buachani scheida heagkibdd und glochdd und gmoand:
„do hosdd a oawad, dasdd nexddn windda wieda a woami schdubm hosdd!“
doun isa wieda gfoan und hod mi mid den trum hauffm scheida aloani lossn und i hou glei driwagrichdd zan zoumschlichddn, damid i des xaggarad nu oissa druggani af d reih bring und mei soch ned loung van regn gwoagdd wiad.
gschwind hou i a boa oide baleddn zoumglegdd, damid mei kachöofmfuada ned en da niadan af da eadn ling muas, hiaz richdd i glei iwas scheidaschlichddn und oawadd dahi en mein dendl, und dawaö i so weagg und dschinaö kemand ma udoungs haöfddi gedanga, waö de oadd va oawad hod iganddwia wos medidaddives, bsinnlichs, und ma kimd leichd ens sinian.
unsa wäd is jo habdguad foisch, deng i ma, waö wounsdd schausdd, wos da seinazeiddige innenminisdda, oana va de hofingabuam, en sein mochddrausch afgfiad hod, do kundd ma jo voa laudda wud d froasn gring. und nochand, wouns wieda zan wähn is, doun wiad kreidn gfressn und schee greed, waö ofddnd woins wieda unsa heazz und unsa sä und se foan va owabrennesslbrugg bis noch unddawadschnbam, um uns des blaue van hümö z vaschbrecha und se wundan se, wiaso eana ba de sundaredn lenxdd neamdd mea zualosn mog.
damid i af oundani gedanga kim, schau i ma voi freid meini scheida ou.
a eamsämddige soch hod ma mei hoizbaua heia wieda brochdd und schee drugga is schou des hoiz, des ken i am gwichdd. grod rechdd, ois se des gschbü fia a zwoajahrigs hoiz kead, waö scheida und brügön, wo gesddan nu de vögö draf bfiffm houm, des wa nix fia unsan kachöofm.
de oawad gehd ma schleini van henddn und i hou den easchddn kreizschdoss glei feadi. fian kreizschdoss muas i hibbsch glei schdoaggi scheida suacha und de schenan auswendi und de schiachan eiwendi hieleng, damid des gschbü ned uglei oda woglad wiad und am end umfoid.
kundd leichd sei, das ba deara üwung de owan briada va da schdoischdod gfähd houm, waö des hand jo dead nu de gressan muaxa. voi subba is des, wos de kunddn z schdound brochdd houm, waö es is jo e wuaschd, is jo e bowidl, es zoid jo e de oigemeinheid. und hiaz houms an hauffm schuidn und wissen nima wohea nu a gäd nehma und neamdd is schuid und neamdd hod wos gwisdd und neamdd kou wos dafia. dübbisch boliddigga.
owa ban bruggnafesdd wü da owalinza koani goidhaubmfrauen af da bühne hobm, waö mia han jo so gscheid, so hifiagedangi und modean. und wichddi, dass gounz aus is. goaned zan damessn.
hiaz wiads zeid, das i mid meina oawad feadi wead, waö es schaud gounz noch regna aus und i mechdd de scheidadrisddn zuahün a nu, so leg i mi ins zeig und drah mi a wenig schleiniga um, damid i mei voahobm oissa guadi z end bringa kou und meini scheida und i, ned noss wean.
va da schdross hea hubbd ma a auddo und i wachld mid de hendd, obwoi i goaned xeng hou, wea mi do ggriassd hod und deng ma, oiss is reladdiv, waö z jabban houms gounz oundari sorgn und des lound schdehd am obgrund. ubandi fü leid hand ba den ugligg gschdoam und fü mea wean nu an de foign schdeam. und easchdd woun se da wind drahd, doun iss gounz aus. dawaö houm s gmoand, se houm oiss z griff, owa das se da wind hamesch drah kundd, damid hod neamdd grechnd. und hiaz is oiss vagifdd en deara gegndd do drendd, fü weida ois mia denga kinan und da wind drahd se nima zrugg.
so, zuwa mid de lezddn boa scheidln. gschwind, waö es foungd schou zan dröbbfön ou. und driwa mid da bloachan und mid a boa bredln ougnogld und iwasi af de drisddn nu a boa baleddn auffigschmissn, damids ma de bloachan schee niedahoidn und da wind koan schodn ourichddn kou, wouna se drahd.
guad iss gounga, nix is gscheng und i hou mei kachlofmhoiz fia s nexddi joa banound. fraöli, kundd i mei heisl begwema hoazzn und hed koan dreg und koa oawad. owa i wü ned. i wü des hoiz riacha. i wü de buachan, oachan, eschan und feichddan scheida ougreifm, begereifm und schmegga. wearasddn heislbau is e so a umgeha van gas dogschdounddn und hed ma vazöd, wia fesch und kumodd hoid des gas fia ins wa, waö des hoazzn mid an kachlofm is va voagesddan, hoda gmoand, da gasmou. des gas, hoda gschwanad, des is ba mia jo do und gehd glei doadd hidou af da grundgrenz voabei.
do bisdd a weng d schbod drou, mei liawa mou, hou i seinazeid za eam xogdd und gmoand: “hiaz schau di um do ba mia! da woid woa weid friara do ois dei gas und de sun wiad ma mei lewadog ned oamoi a rechnung schigga”. do hoda mi ougschaud, da gasmou, ois woun i a besi groungad hed und hod en schedl beidld und is aus ban dämbbö. i siag heid nu des bledi xichdd voa meina, ois ea za seina graxn grennd is.
und heid is schou wieda a so a dog, wo i ned zuahoazzn muas, waö ma da winddagoaddn va da sunseiddn hea des heisl so guad gwahmd hod, dass a freid is. und i bi ma sicha, des is ned umasunzdd, owa gounz gwies graddis.