Wenne hot augekleart augeheart?

Ih bin in ar groaßn Stodt in an groaßn Museum. In an groaßn Sool voller Zuig, dreihundrt Johr zrugge. Zommtrogn gelot von an Monnats. A Besserer, am End a Spinnr sogor, a Schlauchr gonz sichr. Oar, der gewescht hot, wos er will. Di Walt heazoagn, drklearn wömeglach, sammlen gewiss. Is Bsundre, is Rare, vön meglachst weit hea, vön hintrchtn Winkl, vön öbarchtn Bargnen, vön eißarcht hervöarn. An Vögl mit ar farbign Fedra, an Bröckn mit an glitzratn Stoan, a Gewond von an Kinig, an Pater sei Buach, vön an Nalan di Händlinge, ar Schneggan ihr Haus. Inhn gstellt in a Trihle, augezeichnet mit an Nummerlan und ingetrogn in a mords Trum Buach. Er hot s gewellt wissen, olles gonz genau. Wer wia wö hauset, wia longe und wia broat, wia tiaf und wia hoach, wörum und wiasö. Seit wenne und wia longe nöh, mit wen und fiar wose. Wos rund ischt, wos eggat, wos schmecket und stinket, warmet und larmet, hebet und lebet, stupfet und hupfet.

Er hot s gewellt versteahn, drzehln, heazogn und untr di Leite bringen. Hot gelot Listnen mochn und Tafelan, Bildlen und Heftlan, von an Haufn gscheite Leite, und olle hobm geton, wia er s ihmene gset hot. A Haus hot er gelot bauen, mit dicke Mauren wia bei ar Burg. Fiar jede Froge an oagene Komra, fiar jede kloanare a Kastle, fiar di nöh kloanare a Ladle und fiar di gonz kloanen a Fachle. Asou hot olles sei Ordnige. Hot iatz augekleart augeheart?